韓國有個東大門，香港有條東大街，自問是掃街王的你，若果都未掃過東大街，就一定要去掃下啦！今期街頭美食，就由網絡人氣Youtuber 「Dai Wing」帶你食遍筲箕灣「東大街」！
來到整條街上都是美食的東大街，唔知食乜嘢？Dai Wing訣竅是依著順序從街頭掃到街尾，快睇下她的心水推薦！
第一站：安利魚蛋粉麵
筲箕灣東大街的安利魚蛋粉麵開業多年，以清湯腩及魚蛋粉遠近馳名，店外經常大排長龍，吸引眾多熟客捧場，包括名人林海峰、李璨琛亦到來撐場。除了清湯腩及魚蛋粉出名之外，他們的多士亦是「無得彈」！
『招牌』鮮奶油多（$12）
Dai Wing點評：好正吖，真係好正，多士好脆好香，多士本身唔係好熱，所以塊厚切牛油唔會好溶，反而食落仲有啲咬口，真係好味，不過太邪惡了，食完又 要肥幾磅啦！
Dai Wing評分：★★★★★（爆分呀！）
Dai Wing點評：份西多士好厚身，食落好有蛋味，唔會好油，夠熱夠香，而且個邊好脆，糖漿杰身啲，個人覺得如果西多士入面有餡料，成件事就會更吸引！
Dai Wing評分：★★★★☆(4分)
第二站：幸福小食便利店
筲箕灣港鐵站出口旁有一條短巷，其實是小食街，有泰菜店、上海菜店、台式飲品店，但最得街坊愛戴的，是一間細小的小食店，賣燒賣、牛肉球、生菜魚肉、碗仔翅等！
手打魚肉碗仔翅（小$18 大$24）
Dai Wing點評： 食落唔似碗仔翅，反而似「羹」，口感就差啲，但手打魚肉食得出係自家製，魚肉味好鮮。
Dai Wing評分：★★★☆☆(3分)
第三站：大觀園舊式茶站
東大街食街戰場生力軍「大觀園」，主打重慶小雲吞及冷麵。而據聞店內的凍奶茶亦很受歡迎，用黑白淡奶沖成，茶味濃且香滑。Dai Wing就選擇了不少港人的童年回憶－紅豆冰，配合大觀園的招牌奶茶，味道會是如何？
奶茶紅豆冰（$16）
Dai Wing點評： 我好少飲奶茶，飲一啖我就可以眼光光到天光，呢度嘅奶茶茶味好濃郁，甜度正常，紅豆硬身，食落好有咬口，不過由於個人食野喜好偏甜，所以要扣一分。
Dai Wing評分：★★★★☆(4分)
第四站：低調高手大街小食
港人最愛的街頭小食，雞蛋仔必定入選。位於筲箕灣小巷裏的「低調高手大街小吃」，更是東大街食街的「皇中皇」，其雞蛋仔人氣非常旺，全日有人龍，傳聞皆因蛋香濃郁，香脆鬆軟，少甜，很好吃。Dai Wing一係唔試，一試當然要試特別啲，就試「低調高手」的格仔餅，看它是否同樣出色！
經典格仔餅（一底$16 兩底$30）
Dai Wing點評： 食完之後，完全明白點解佢咁出名，個格仔餅本身嘅質地唔乾唔硬，口感好軟好棉，有啲似蛋糕，真係好香，配埋個餡料，真係滿分！我相信佢賣嘅雞蛋仔會係同樣出色！
Dai Wing評分：★★★★★（爆分呀！）
第五站：呂仔記
街上有賣碗仔翅，燒賣，咋喳，賣出個名堂來，呂仔記就是此街的一個傳奇。當中，魚肉燒賣更是呂仔記得意之作，魚肉燒賣有魚味，絕不是必然，皆因坊間的所謂魚肉燒賣，都是沒有味道。據聞要吃真正的魚肉燒賣，就要到呂仔記，Dai Wing當然要去印證一下啦！
自製魚肉燒賣（8粒$24 一打$36）
Dai Wing點評：「好難形容，真係好難形容！」（十分鐘過去…..）「真係撓哂頭！」，唔似食緊燒賣，唔知食緊咩，同平時啲味完全唔同，魚肉味都同出面唔同，「扮燒賣嘅魚蛋？」
Dai Wing評分：★★★☆☆（…..完全唔係心目中嘅燒賣）
東大街美食太多，可惜Dai Wing「容量」有限，試盡都只可以一次過介紹五間。下次，一定帶大家再掃過，食盡東大街！
想了解更多有關Dai Wing嘅channel以及重溫咁多集「掃Dai街」可以去返
https://www.youtube.com/user/DaiWingPlay/videos
轉自 ETNET 經濟通 生活副刊
http://lifestyle.etnet.com.hk/co ... od/35219&part=2